يا من من اجل العز تخسر ملايين = ابشرك بالعز وبلا خساره العز يا من ترجي العز في الدين = ماهو في الدنيا وحب التجاره العز في اخوة رجال عزيزين = الكل منهم عز ربي وقاره يسعون في نشر الرساله من سنين = وفيهم لجهد الدين شوق وحراره من جهدهم ياما اهتدى مضلين = ومن يهتدي معاد غير مساره ياما دعوا راعي معاصي وتدخين = يومه غدى ليل وليله نهاره والله هداه وشكلوه الميامين = خرج وطلق بالثلاث السجاره وانا من اول كنت غافل ومسكين = واحط نفسي في الصداره وسير على ربع عزاز وغاليين = وقالوا على اخوتك نعطي بشاره قلت ابشروا قالوا متى قلت ذا الحين = غصب على قلبي ماهو بإختياره بس إصبروا وأدعوا أن قلبي يلين = احس أنا قلبي سواة الحجاره خرجت معهم كأن في النحر سكين = أصارع الهاجوس تاره وتاره نفسي تقول يسار وانا أبغى يمين = شنت على نفسي ثمانين غاره وأثر اهل الدعوه على الحق ماشيين = تعاونوا للدين لأجل انتشاره لقيتهم ناس صيام مصلين = يرجون جنات الكريم وجواره ناس ليا قفا من الليل ثلثين = صلوا لوجه الله على طهاره في مسجد ما تقتربه الشياطين = يحرم على الشيطان لمسة جداره منهم تعلمنا صفات الرضيين = كفارة المجلس واداب الزياره ومنهم عرفت اني لحترت بأمرين = لا بد اصلي ركعتين استخاره تغيرت الأحوال في ظرف يومين = وأحتقرت عمر يستحق أحتقاره عمر خسرته حول خمس وثلاثين = ما غير في غفله ولهو وإثاره القلب دمه يدفعه بالشرايين = مثل المدير اللي يدير الإداره إذا صلح مديرها والله يعين = فازت الإداره بإحترام الوزاره ولا يطير الطير لولا الجناحين = ولينكسر ريشه تعثر طياره يا فاتن الدنيا حياتك الى وين = لا بد من يوم تزاح الستاره عليك دين وواصلك راعي الدين = ديانك اللي ما ياجل قراره يضيعون اسمك قرابتك الأدنين = وينسون حتى القابك المستعاره وبعده يشيلونك للقبر عاجلين = وتحط في قبر يثور غباره يذهب معك ثلاث ويعود اثنين = الحر يفهم مقصدي من الإشاره كان العمل لجاء سؤال القبر زين = غدا القبر روض تطارخ أنهاره وان كان العمل لجاء سؤال القبر شين =يضيق قبرك وتشويك ناره إما تفوز بشئ ما شافته عين = ولا خساره ما بعدها خساره إن شاء الله كلنا مستعدين = على العلاج اللي بدون إستشاره"